Tymor yr hydref hwn, cafodd myfyrwyr o’r cwrs Lefel 3 mewn Therapi Chwaraeon yng Ngholeg Afan y fraint o weithio gyda’r tîm Cynghrair Rygbi Cymru Dragonhearts.
Fel rhan o’u hyfforddiant ymarferol, darparwyd triniaethau tylino chwaraeon gan y myfyrwyr ar ôl digwyddiadau i gefnogi adferiad y chwaraewyr ar ôl sesiwn hyfforddi a’u helpu i ymbaratoi ar gyfer eu gêm yn erbyn Lloegr sy’n dod yn fuan.
Trefnwyd y sesiwn gan y tiwtor Wayne Robson-Brown, mewn cydweithrediad ag hyfforddwr tîm cyntaf y Dragonhearts.
Canmolwyd y myfyrwyr yn uchel gan dîm rheoli Cynghrair Rygbi Cymru, wrth sylwi ar eu hymddygiad proffesiynol ac ansawdd eu triniaethau a dweud y byddent yn “sicr o weithio gyda’r myfyrwyr unwaith eto,” gan ddisgrifio’r triniaethau tylino fel “enghreifftiol.”
Yn ystod y sesiwn, defnyddiwyd ystod o dechnegau tylino chwaraeon uwch gan y myfyrwyr yn cynnwys effleurage, petrissage, dirgryniadau, yn targedu grwpiau allweddol o gyhyrau fel coesau, gwddf, cefn ac ysgwyddau. Addaswyd dyfnder a phwysedd pob techneg i fodloni anghenion unigol pob chwaraewr. At hynny, cyflwynwyd ymestyn goddefol i wella symudedd y cymalau ac adfer ystod normal o symudiadau i ymbaratoi ar gyfer perfformiadau’r dyfodol.
Mae profiadau fel hyn yn cynnig cyfleoedd dysgu go iawn gwerthfawr sy’n galluogi myfyrwyr i gymhwyso’r wybodaeth a ddysgwyd at leoliadau proffesiynol go iawn. Mae gweithio’n uniongyrchol gyda thîm rygbi rhyngwladol yn helpu i fireinio eu sgiliau ymarferol, eu hyder a’u dealltwriaeth o therapi tylino chwaraeon mewn amgylchedd perfformiad uchel.
Myfyriodd Chris Dawson myfyriwr Lefel 3 Tylino Chwaraeon ar y profiad:
“Roedd gweithio gyda thîm Cynghrair Rygbi Cymru Dragonhearts yn brofiad ardderchog a oedd yn gwella fy nealltwriaeth o Therapi Tylino Chwaraeon. Rhoddwyd cyfle i fi gymhwyso’r technegau a ddysgais yn y coleg at athletwyr proffesiynol gydag anghenion adfer penodol. Roedd y cyfle ymarferol hwn i gefnogi tîm chwaraeon proffesiynol yn foddhaol ac yn addysgol.
Mae astudio Lefel 3 mewn Tylino Chwaraeon yng Ngholeg Afan wedi rhoi’r profiad ffantastig i fi. Roedd wedi fy ngalluogi i ddefnyddio fy hyfforddiant mewn dull ymarferol a chael mewnwelediad go iawn i ofynion therapi chwaraeon. Roedd y profiad o weithio gydag amrywiaeth o gyrff gwahanol a thrin problemau unigol penodol y chwaraewyr hefyd wedi gwella fy sgiliau ymarferol. Roeddwn i wrth fy modd ar y diwrnod ac mae wedi tynnu sylw at ba mor effeithiol a chynhwysfawr yw’r dysgu yng Ngholeg Afan.”
Dragonhearts Cymru yw’r tîm sy’n cynrychioli system cynghrair domestig Cymru. Mae’r holl chwaraewyr sy’n chwarae yn y gêm genedlaethol yn Nhe a Gogledd Cymru yn gymwys i gael eu dethol. Gallwch ddod o hyd i ragor o fanylion amdanynt yma: https://rugbyleague.wales/about-the-dragonhearts
Os oes gennych ddiddordeb yn ein cwrs Therapïau Chwaraeon, gallwch gael rhagor o fanylion a gwneud cais yma: https://www.nptcgroup.ac.uk/courses/level-3-diploma-in-sports-injury-prevention-and-management-vtct-full-time
