Mae Gabrielle Wilson o Raeadr, myfyrwraig Arlwyo yng Ngholeg Y Drenewydd, sy’n cael ei hadnabod fel Gabby, yn mynd i Ddenmarc ym mis Medi i brofi ei sgiliau yn erbyn hufen Ewrop yn EuroSkills Herning 2025. Dyma gystadleuaeth sgiliau fwyaf Ewrop ac mae’n cael ei chynnal rhwng 9 a 13 Medi.
Yn dilyn llwyddiant Gabby yn y cystadlaethau sgiliau cenedlaethol, mae WorldSkills UK, mewn partneriaeth â Pearson, (FTSE: PSON.L), cwmni dysgu gydol oes y byd, wedi cyhoeddi y bydd Gabby yn ymuno â Thîm y DU.
Bydd Tîm y DU yn cystadlu mewn llu o ddisgyblaethau sgiliau sy’n hanfodol i ddyfodol pob un ohonom ni. Ar ôl bod drwy fisoedd o brosesau cystadlu a dethol, maen nhw bellach yn wynebu misoedd olaf hollbwysig eu rhaglen hyfforddi ddwys ar gyfer EuroSkills Herning 2025.
Mae WorldSkills UK yn defnyddio cyfranogiad yng nghystadleuaeth EuroSkills i hyrwyddo rhagoriaeth sgiliau ledled y DU ac i ymgorffori safonau hyfforddi o’r radd flaenaf. Mae EuroSkills Herning 2025 hefyd yn cael ei ystyried fel prawf litmws hanfodol i fesur parodrwydd y DU i gystadlu ar y llwyfan byd-eang yng Nghystadleuaeth WorldSkills. Yn cael ei adnabod fel y ‘Gemau Olympaidd sgiliau’, cynhelir y WorldSkills nesaf yn Shanghai, Tsieina ym mis Medi 2026. Yn dilyn cyfranogiad Gabby yn EuroSkills, bydd yn mynd ymlaen i gystadlu am le yn y tîm i gynrychioli’r DU yn WorldSkills Shanghai 2026.
Dywedodd Ben Blackledge, Prif Weithredwr WorldSkills UK: “Rydyn ni mor gyffrous am fod yn cefnogi ac yn meithrin y grŵp gwych yma o ieuenctid proffesiynol wrth iddyn nhw deithio i Ddenmarc i gystadlu.
“Bydd cyfle iddyn nhw gael eu profi i’r safonau uchaf, gan arddangos y sgiliau mae cyflogwyr byd-eang yn chwilio amdanyn nhw, a byddant yn dychwelyd i’r DU gyda’r wybodaeth a’r profiad a fydd yn rhoi hwb i’w gyrfaoedd.
“Mae EuroSkills yn brawf yn y pen draw ar ba mor gystadleuol yn rhyngwladol yw sgiliau’r DU. Mae’n rhoi hwb i ni godi safonau gartref a helpu mwy o bobl ifanc i gael swyddi o ansawdd uchel.”
Dywedodd Freya Thomas Monk, Rheolwr Gyfarwyddwr Pearson Qualifications:
“Rydyn ni’n eithriadol falch o gefnogi’r grŵp ysbrydoledig yma o bobl ifanc wrth iddyn nhw baratoi ar gyfer her EuroSkills eleni. Mae dathlu’r gorau o addysg dechnegol a galwedigaethol a chodi bri’r sector yn bwysig iawn i ni. Rydw i’n dymuno’r gorau i Dîm y DU wrth iddyn nhw baratoi i gystadlu yn Nenmarc ym mis Medi.”
Pearson yw partner swyddogol Tîm y DU ar gyfer EuroSkills Herning 2025 a WorldSkills Shanghai 2026, yn dilyn partneriaeth lwyddiannus yn WorldSkills Lyon yn 2024.
