Mae Grŵp Colegau NPTC yn dathlu llwyddiant eithriadol yn dilyn Rowndiau Terfynol Cenedlaethol WorldSkills UK eleni, gyda deg dysgwr talentog yn cystadlu ar draws cystadlaethau Adeiladu Sgiliau, WorldSkills UK Prif Ffrwd, a WorldSkills UK Sylfaen — ac yn sicrhau pum medal cenedlaethol arbennig.
Cyflawnodd y Coleg:
- Aur – Sgiliau Sylfaen Gwasanaethau Bwyty
- Arian – Technegydd Labordy
- Efydd – Celfyddydau Coginio, Ail-orffen Moduron, a Thechnegydd Labordy
Mae’r perfformiad rhyfeddol hwn yn gosod Grŵp Colegau NPTC yn gadarn ymhlith y deg coleg gorau yn y DU ar gyfer cystadlaethau Prif Ffrwd a Sylfaen. Mae’r Coleg wedi’i raddio yn gydradd drydydd yn genedlaethol ar gyfer cystadlaethau Sgiliau Sylfaen ac yn gydradd bumed ar gyfer cystadlaethau Prif Ffrwd.
Perfformiodd Cymru yn eithriadol o dda ar y cyfan hefyd, gyda saith coleg yng Nghymru yn y deg uchaf cenedlaethol.
Enillwyr Medalau – Grŵp Colegau NPTC
- Aur – Sgiliau Sylfaen Gwasanaethau Bwyty: Zara Fisher
- Arian – Technegydd Labordy: Ashley Coles
- Efydd – Technegydd Labordy: Joseph Battle
- Efydd – Ail-orffen Moduron: Dafydd Jones
- Efydd – Celfyddydau Coginio: Eleri Davies
Roedd pob un o’n cystadleuwyr yn y rownd derfynol eisoes wedi cyflawni llwyddiant sylweddol cyn y Rowndiau Terfynol Cenedlaethol, ar ôl cymhwyso trwy ragori mewn cystadlaethau rhanbarthol. Dim ond yr wyth cystadleuydd gorau o bob categori rhanbarthol ledled y DU enillodd le gwerthfawr yn y Rownd Derfynol Genedlaethol, gan wneud cymhwyso ynddo’i hun yn gamp ragorol.
Canmolodd Kathryn Dunstan, Pennaeth Cynorthwyol (Masnachol) yng Ngrŵp Colegau NPTC, y cystadleuwyr am eu hymrwymiad a’u rhagoriaeth:
“Llongyfarchiadau i’n henillwyr medalau ac i’r rhai a gynrychiolodd Grŵp Colegau NPTC yn y Rowndiau Terfynol Cenedlaethol. Roedd yn gamp ynddi’i hun i gyrraedd y rownd derfynol gan mai dim ond wyth cystadleuydd a ddewiswyd o bob cwr o’r DU ar gyfer pob cystadleuaeth. Rydym wrth ein bodd bod lefel sgiliau, hyfforddiant ac ymroddiad y myfyrwyr hyn wedi cael eu cydnabod ar y llwyfan cenedlaethol.”
Mae’r Coleg yn priodoli’r llwyddiant hwn i waith caled eithriadol dysgwyr, ymroddiad staff, a chryfder ei raglenni hyfforddi sgiliau, sy’n parhau i fod ymhlith y gorau yn y DU.
