Mae tri myfyriwr o Grŵp Colegau NPTC wedi arddangos eu doniau pêl-droed ar y llwyfan rhyngwladol, gan gynrychioli’r Colegau Cymreig yn erbyn Ysgolion Awstralia ar Goedlan y Parc, Aberystwyth.
Er gwaethaf gêm galed, collodd Colegau Cymru o 3-1, gydag Ollie Anderson yn sgorio unig gôl y tîm cartref. Fodd bynnag, i’r myfyrwyr Griff Davies, Dylan Packer, a Rocco Dyer, roedd y profiad o chwarae pêl-droed rhyngwladol yn amhrisiadwy ac yn dyst i’w hymroddiad a’u sgil.
Enillodd Griff Davies, myfyriwr chwaraeon o Goleg y Drenewydd, ei gap cyntaf i dîm Colegau Cymru, gan chwarae 60 munud yn erbyn tîm da iawn o Awstralia. Roedd y gêm hon yn dilyn ymgyrch lwyddiannus gyda Cholegau Cymru, lle sicrhaodd Griff a’i gyd-chwaraewyr record ysgubol yng nghystadleuaeth y Tair Gwlad, gan drechu Colegau Lloegr (6-1), Ysgolion Annibynnol Lloegr (3-0), ac Ysgolion Awstralia (2-1).
Wrth fyfyrio ar ei gyflawniadau, dywedodd Griff:
“Fyddwn i ddim wedi mynd i’r treialon heb i’r Coleg fy enwebu. Mae’r hyfforddiant pêl-droed bron bob dydd wedi fy helpu yn gorfforol ac yn dechnegol, gan ganiatáu i mi gamu i fyny i bêl-droed rhyngwladol. Mae gemau Colegau Cymru wedi fy ngwneud yn well gan eu bod mor ddwys. Mae’r chwaraewyr eraill yn fois da ac yn chwaraewyr o’r safon uchaf. Fe gymerodd gêm i ni ddod i adnabod ein gilydd go iawn, ond rydyn ni wedi dod at ein gilydd ac wedi perfformio’n dda. Roedd yr arosiadau dros nos yn brofiad gwych, gan roi cipolwg i mi ar bêl-droed proffesiynol a bod yn athletwr elitaidd. Rwy’n edrych ymlaen at y gemau sydd i ddod gydag Ysgolion Cymru a’r posibilrwydd o chwarae yn nhwrnamaint Roma Caput Mundi yn yr Eidal.”
Chwaraeodd y myfyriwr Safon Uwch Coleg Castell-nedd, Dylan Packer, y 90 munud llawn yn ei ail gêm ryngwladol i Golegau Cymru. Fel Griff, roedd yn rhan o garfan Colegau Cymru wnaeth ddominyddu cystadleuaeth y Tair Gwlad, gan fethu dim ond pum munud o bêl-droed ar draws y tair buddugoliaeth.
Wrth siarad am ei brofiad rhyngwladol, dywedodd Dylan:
“Roeddwn yn gobeithio mynychu’r treialon eto eleni ar ôl rhywfaint o siom y llynedd. Mae hyfforddi bron bob dydd gyda fy nghlwb a chwarae pêl-droed coleg yn fy ngalluogi i chwarae ar lefel uchel gydag ychydig iawn o flinder. Mae gemau Colegau Cymru wedi hogi fy sgiliau gan eu bod mor ddwys. Mae’r chwaraewyr o’r safon uchaf, ac o adnabod llawer ohonyn nhw o bêl-droed clwb, roedd yn hawdd dechrau sgyrsiau a chwarae’n hyderus. Roedd yr arosiadau dros nos yn brofiad gwych, gan helpu i adeiladu perthynas gyda chyd-chwaraewyr. Rwyf wrth fy modd i gael fy newis ar gyfer y daith i’r Eidal ac yn gobeithio parhau â’m perfformiadau i gyflawni canlyniadau da yno.”
Roedd y myfyriwr gwaith coed o Goleg Castell-nedd Rocco Dyer hefyd yn rhan o’r gêm yn erbyn Awstralia, gan chwarae’r 90 munud lawn. Yn chwaraewr allweddol i Lansawel, cynrychiolodd Rocco Gymru yn y Darian Canmlwyddiant ochr yn ochr â Dylan Packer.
Wrth fyfyrio ar ei ymddangosiad rhyngwladol diweddaraf, dywedodd Rocco:
“Roedd yn anrhydedd enfawr gwisgo crys Cymru a chwarae yn erbyn gwrthwynebwyr mor gryf. Roedd dwyster y gêm yn anhygoel, a rhoddais bopeth oedd gennyf dros y tîm. Wedi chwarae gyda Dylan yn barod i Lansawel ac yn y Darian Canmlwyddiant, roedd hi’n teimlo’n wych bod nôl ar y cae gyda’n gilydd. Mae’r profiadau hyn yn fythgofiadwy ac yn fy ngwthio i barhau i wella.”
Matt Jones yw’r Dirprwy Bennaeth Chwaraeon a Gwasanaethau Cyhoeddus ac roedd ganddo hyn i’w ddweud am Golegau Cymru:
“Mae safon y pêl-droed ar draws Colegau Cymru yn eithriadol o uchel, ac mae Dylan, Rocco a Griff wedi gwneud yn arbennig o dda nid yn unig i gyrraedd y garfan ond hefyd i gael effaith sylweddol yn y gemau a chwaraewyd hyd yn hyn. Fel adran, rydym yn hynod falch o’u cyflawniadau ac yn dymuno pob lwc iddynt yn yr Eidal.
Mae Grŵp Colegau NPTC yn hynod falch o Griff, Dylan, a Rocco am eu cyflawniadau rhyngwladol. Mae eu gwaith caled, eu hymrwymiad, a’u dawn wedi eu harwain at y cam hwn, ac mae’r colegau’n edrych ymlaen at eu gweld yn parhau â’u llwyddiant ar y cae ac oddi arno.
