Mae Academi Sgiliau Cymru (SAW) wedi’i chydnabod fel y Darparwr Prentisiaethau sy’n Perfformio Orau yng Nghymru. Wrth arwain Partneriaeth Dysgu Seiliedig ar Waith SAW, mae Grŵp Colegau NPTC yn ymgysylltu’n effeithiol â deuddeg darparwr hyfforddiant sy’n cynnig cyfleoedd prentisiaeth ledled Cymru. Daw’r gydnabyddiaeth yn sgil Mesurau Deilliannau Dysgu Medr ar gyfer Prentisiaethau 2023/24 sydd newydd gael eu cyhoeddi.
Dywedodd Nicola Thornton-Scott, Pennaeth Cynorthwyol Dysgu Seiliedig ar Waith: “Mae’r cyflawniad hwn yn amlygu ein hymrwymiad i ddarparu ystod amrywiol o gyfleoedd i brentisiaid ddatblygu eu sgiliau a gwella eu cymhwysedd mewn amrywiol sectorau.”
Mae’r rhaglenni prentisiaeth wedi’u cynllunio i arfogi unigolion â’r profiad ymarferol a’r cymwysterau angenrheidiol i ffynnu yn y gweithlu, gan sicrhau eu bod wedi’u paratoi’n dda ar gyfer heriau marchnad swyddi sy’n datblygu’n gyflym. Drwy gynnig ystod mor eang o lwybrau galwedigaethol, mae SAW, sydd newydd ddathlu ei 15fed pen-blwydd, yn galluogi prentisiaid i ddatblygu eu gyrfaoedd a chyfrannu’n ystyrlon i’w cymunedau.
Ychwanegodd Nicola: “Yn ogystal â meithrin twf unigolion medrus, mae Academi Sgiliau Cymru yn chwarae rhan hanfodol wrth gefnogi cyflogwyr ledled Cymru. Rydym wedi ymrwymo i roi mynediad i fusnesau at weithlu medrus iawn, gan helpu i adeiladu cyflenwad talent cryf ar gyfer y dyfodol. Mae ein rhaglenni wedi’u teilwra i ddiwallu anghenion penodol cyflogwyr sy’n cefnogi gweithlu hyblyg y gellir ei addasu i ddiwallu anghenion newidiol eu busnes a bod yn ymatebol i ofynion y farchnad. Wrth i ni ddathlu’r cyflawniad sylweddol hwn, mae Academi Sgiliau Cymru yn parhau i fod yn ymroddedig i rymuso dysgwyr a chyflogwyr, cryfhau economi Cymru a meithrin dyfodol mwy disglair i bawb.”
